Коми Республикаса Государственнöй Сöвет лоö медвылыс да дзик öти пыр уджалысь Коми Республикаса бöрйöм да законодательнöй власьт органöн.
Государственнöй Сöветö пырö 30 депутат, кодъясöс бöрйöны Россия Федерацияса граждана, кодъяс олöны Коми Республика мутасын да кодъяслöн федеральнöй оланпас серти эм бöрйысьöм вылö право, гусьöн гöлöсуйтöмöн ставлы сетöм öткодь да веськыд бöрйысян право подув вылын.
Государственнöй Сöвет бöрйыссьö нёль во кежлö.
Государственнöй Сöветлöн эм юридическöй кывкутысьлöн правояс, эм канпаса печать.
Коми Республикалöн Государственнöй Сöветса депутатöн вермасны бöрйыны Россия Федерацияса гражданинöс, кодлы тырис 21 арöс да кодлöн федеральнöй оланпас, Коми Республикаса Оланподув да Коми Республикаса оланпас серти эм право лоны бöрйöмаöн.
Коми Республикаса Государственнöй Сöветö бöрйысян пöрадок урчитсьö Коми Республикаса законодательствоöн Россия Федерацияса законодательство серти.
Государственнöй Сöвет аскежысь видлалö юалöмъяс, кутшöмъяс инмöны сылöн организационнöй, правовöй, информационнöй, материально-техническöй да финансöвöй уджлы.
Коми Республикаса Государственнöй Сöветлысь удж могмöдöм вылö рöскод артавсьö Коми Республикаса республиканскöй бюджетын торъя стрöкаöн.
Коми Республикаса Оланподув, 71 статья.
Государственнöй Сöвет уджалö сессияясöн, кытчö пырöны заседаниеяс, а сідзжö комитетъяслöн, Государственнöй Сöветса мукöд органлöн заседаниеяс.
Государственнöй Сöвет чукöртчö медводдза заседание вылö бöрйысян лун бöрын дас витöд лунö, кор сэтчö бöрйöма урчитöм депутат лыдысь кык коймöд юкöнысь абу этшаджыкöс. Медводдза заседаниесö восьтö арлыд серти медыджыд депутат.
Государственнöй Сöветлöн заседание лоö правомочнöйöн, сэні кö уджалöны урчитöм депутат лыдысь кык коймöд юкöнысь оз этшаджыкыс. Государственнöй Сöветлöн правомочнöй заседание нуöдсьö куим тöлысьын öтчыдысь оз гежöдджыка.
Государственнöй Сöветлöн заседаниеяс нуöдсьöны восьсöн, федеральнöй оланпасъясöн, Коми Республикаса законодательствоöн да Коми Республикалöн Государственнöй Сöветса Регламентöн урчитöм случайяс кындзи.
Государственнöй Сöвет котыртö комитетъяс, Государственнöй Сöветлысь мукöд орган.
Асланыс лыдысь депутатъяс бöрйöны Государственнöй Сöветса Веськöдлысьöс, сійöс вежысьясöс, Государственнöй Сöветса комитетъясöн, мукöд органöн веськöдлысьясöс либö юрнуöдысьясöс да найöс вежысьясöс.
Депутатъяс вермасны вöчны Государственнöй Сöветын депутатскöй уджсö профессиональнöй подув вылын пыр либö медшöр уджысь дугöдчытöг. Профессиональнöй подув вылын пыр уджалысь депутат лыд урчитсьö Коми Республикаса оланпасöн.
Коми Республикаса Государственнöй Сöветлöн, сылöн органъяслöн да чина йöзлöн уджалан пöрадок урчитсьö Коми Республикалöн Государственнöй Сöветса Регламентöн, а Государственнöй Сöветса органъяслöн уджалан пöрадок вермас урчитсьыны сідзжö тайö органъяс йылысь положение (юкöнъяс)ясöн.
Коми Республикаса Оланподув, 72 статья.
Коми Республикаса Государственнöй Сöвет:
1) примитö Коми Республикаса Оланподув, пыртö сэтчö вежсьöмъяс да (либö) содтöдъяс;
2) оланпасъясöн ладмöдö Коми Республикалы нуöдöм вылö сетöм веськöдланторъяс да Россия Федерациялы да Россия Федерацияса субъектъяслы сетöм öтув веськöдланторъяс Коми Республикаса полномочиеясын;
3) видзöдö та вылö уполномочитöм мукöд органкöд Коми Республикаса Оланподулöн да Коми Республикаса оланпасъясöн урчитöм серти да урчитöм ногöнКоми Республикаса оланпасъясö кутчысьöм да найöс олöмö пöртöм бöрся, Коми Республикаса республиканскöй бюджет олöмö пöртöм, Коми Республикаса территориальнöй государственнöй небюджетнöй фондъясса бюджетъяс олöмö пöртöм, Коми Республикалöн киын кутан эмбурöн вöдитчан урчитöм пöрадокö кутчысьöм бöрся;
4) вöчö мукöд удж, мый урчитöма Россия Федерацияса Оланподулöн, федеральнöй оланпасъясöн, Коми Республикаса Оланподулöн да Коми Республикаса оланпасъясöн.
Коми Республикаса Оланпасöн:
1) урчитсьö Коми Республикалöн административно-территориальнöй тэчас да сійöс вежлалан пöрадок;
2) вынсьöдсьö Коми Республикаса Юралысьöн сетöм Коми Республикаса республиканскöй бюджет да сійöс олöмö пöртöм йылысь отчёт;
3) вынсьöдсьöны Коми Республикаöс социально-экономическöя сöвмöдан уджтасъяс;
4) вынсьöдсьöны вотъяс да öктасъяс, мый урчитöмсö федеральнöй оланпасöн индöма нуöдны Коми Республикалы, а сідзжö найöс перъян пöрадок;
5) вынсьöдсьöны Коми Республикаса территориальнöй государственнöй небюджетнöй фондъясса бюджетъяс да найöс олöмö пöртöм йылысь отчётъяс;
6) урчитсьö Коми Республикаса государственнöй эмбурöн веськöдлан да вöдитчан пöрадок Россия Федерацияса законодательство да Коми Республикаса законодательство серти;
8) урчитсьö Коми Республикаса Государственнöй Сöветö бöрйысьöмъяс нуöдан пöрадок, а сідзжö Коми Республикаса референдум индан да нуöдан пöрадок;
9) федеральнöй оланпасöн индöм полномочиеясын урчитсьö Коми Республика мутасын меставывса асвеськöдлан органъясö бöрйысьöмъяс нуöдан пöрадок;
91) лэдзавсьö муниципальнöй юкöнса бöрйöм орган федеральнöй оланпасöн индöм дырйи да пöрадок серти;
10) вынсьöдсьöны Коми Республикаса сёрнитчöмъяс кырымалöм да киритöм;
11) вынсьöдсьö Коми Республикаса олöмö пöртысь власьт органъяслöн система;
12) урчитсьö Коми Республикаса видзöдан-арталан палата котыртан да сылöн уджалан пöрадок;
13) урчитсьöны Коми Республикаса государственнöй наградаяс да почёт нимъяс;
14) ладмöдсьö мукöд юалöм, кутшöмъясöс Россия Федерацияса Оланподув, федеральнöй оланпасъяс, Коми Республикаса Оланподув да Коми Республикаса оланпасъяс серти индöма нуöдны Коми Республикалы да кутшöмъяс пырöны сылöн полномочиеясö.
Коми Республикаса Государственнöй Сöветлöн Шуöмöн:
1) примитсьö Коми Республикаса Государственнöй Сöветлöн Регламент да решитöны Коми Республикаса Государственнöй Сöветлысь уджалан пытшкöсса распорядок;
2) оформитсьö Государственнöй Сöветса Веськöдлысьöс, Государственнöй Сöветса Веськöдлысьöс вежысьясöс, Государственнöй Сöветса комитетъясöн, мукöд органöн веськöдлысьясöс либö юрнуöдысьясöс да найöс вежысьясöс бöрйöм, а сідзжö Коми Республикалöн видзöдан-арталан палатаса Веськöдлысьöс, сійöс вежысьöс да Коми Республикалöн видзöдан-арталан палатаса аудиторъясöс индöм;
21) оформитсьö Россия Федерацияса Президентлöн вöзйöм кузя Россия Федерацияса гражданинлы Коми Республикаса Юралысьлысь полномочиеяс сетöм да Коми Республикаса Юралысьлöн уджö сылöн босьтчан кад урчитöм йылысь решение;
3) индыссьöны чинö Коми Республикаса Оланподув Ёрдлöн ёрдысьяс;
4) оформитсьö Россия Федерацияса Федеральнöй Собраниелöн Федерация Сöветын Коми Республикаса Государственнöй Сöветöс петкöдлысьöс бöрйöм, а сідзжö Россия Федерацияса Федеральнöй Собраниелöн Федерация Сöветын Коми Республикаса Правительствоöс петкöдлысьöс индöмкöд йитчöм юалöмъяс видлалöм;
5) индыссьöны чинö Коми Республикаса мирöвöй ёрдысьяс;
6) индыссьöны Коми Республикаса бöрйысян комиссияö вына гöлöс правоа джын пырысьыс;
7) индыссьö чинö да мездыссьö чинысь Коми Республикаын мортлысь правояс дорйысь уполномоченнöй;
8) сöгласуйтсьöны Коми Республикаса Юралысьöс вежысьяс, Коми Республикалöн сьöм овмöсса министр, Россия Федерацияын да сылöн субъектъясын, войтыркостса организацияясын да йöз му государство мутасъясын Коми Республикаöс петкöдлысьяс чинö Коми Республикаса Юралысьöн индöм кузя вöзйöмъяс;
9) оформитсьöны ёрдса да правоохранительнöй органъясса кадръяскöд, Коми Республикаса Прокурорöс индöмкöд йитчöм решениеяс Россия Федерацияса законодательство серти;
10) индыссьö Коми Республикалöн референдум;
11) индыссьö Коми Республикаса Государственнöй Сöветö бöрйысьöмъяслöн лун;
12) оформитсьö Коми Республикаса Юралысьлы, а сідзжö сійöс вежысьяслы да Коми Республикалöн сьöм овмöсса министрлы эскытöмлун (эскöмлун) йылысь решение Россия Федерацияса законодательствоöн да Коми Республикаса заоконодательствоöн артыштöм подув вылын да пöрадок серти;
13) вынсьöдсьöны Коми Республикаöс социально-экономическöя сöвмöдан уджтасъяс олöмö пöртöм йылысь отчётъяс;
131) оформитсьö республикаын олöм йылысь да локтан кад вылö Коми Республикаса олöмö пöртысь власьтлöн уджтас йылысь Коми Республикаса Юралысьлысь юöр видлалан кывкöртöдъяс йылысь решение;
14) вынсьöдсьö Коми Республикалысь мудор вежöм йылысь артмöдчöм;
15) оформитсьö Коми Республикаса Юралысь дорö либö Коми Республикаса олöмö пöртысь власьт органъясö шыöдчöм йылысь решение наöн йöзöдан актъясö вежсьöмъяс да (либö) содтöдъяс пыртны либö найöс киритны, либö индöм актъяссö ёрдöн обжалуйтны вöзйöмöн;
16) оформитсьö Россия Федерацияса Федеральнöй Собраниелöн Государственнöй Думаö оланпас вöзъян право серти Государственнöй Сöветлöн шыöдчöм йылысь решение;
17) примитсьö Россия Федерацияса Оланподув Ёрдö, Коми Республикаса Оланподув Ёрдö Россия Федерацияса законодательство да Коми Республикаса законодательство серти шыöдчöм йылысь решение;
18) примитсьö депутатскöй этикакöд йитчöм юалöмъяс кузя решение;
19) гöгöрвоöдсьöны Коми Республикаса оланпасъяс;
20) оформитсьö оланпас примитöм йылысь, а сідзжö оланпас бала примитöм либö вештöм йылысь решение;
21) ошкыссьö полномочиеяс юклöм йылысь сёрнитчöм бала;
22) оформитсьö Коми Республикаса Государственнöй Сöветлы нуöдны сетöм могъяс кузя мукöд решение.
Коми Республикаса Оланподув, 73 статья.
Коми Республикалöн Государственнöй Сöветса Веськöдлысь:
1) öтув веськöдлö Государственнöй Сöветöн видлавны колана юалöмъяс дасьтöмöн;
2) чукöртö да нуöдö Государственнöй Сöветлысь заседаниеяс;
3) кырымалö Государственнöй Сöветöн примитöм шуöмъяс да Государственнöй Сöветса Веськöдлысьлысь тшöктöмъяс;
4) олöмö пöртö Государственнöй Сöветлöн уджкöд йитчöм мукöд полномочие.
Коми Республикалöн Государственнöй Сöветса Веськöдлысьöс вежысьяс:
1) координируйтöны оланпас балаяс да мукöд правовöй акт водзвыв видлалöм кузя комитетъяслысь удж да Государственнöй Сöветлöн мукöд органлысь удж;
2) Государственнöй Сöветса Веськöдлысьлöн тшöктöм кузя олöмö пöртö Государственнöй Сöветлöн уджкöд йитчöм мукöд полномочие.
Коми Республикаса Оланподув, 74 статья.
Оланпас вöзъян правосö сетöма Коми Республикалöн Государственнöй Сöветса депутатъяслы, Государственнöй Сöветса комитетъяслы, Государственнöй Сöветса Веськöдлысьлы, Коми Республикаса Юралысьлы, Коми Республикаса Правительстволы, Коми Республикаса Оланподув Ёрдлы, муниципальнöй юкöнъясса бöрйöм органъяслы, "Коми войтыр" регионкостса общественнöй öтмунöмлы. Государственнöй Сöветса Президиумлöн, пыр уджалысь, недыр кад уджалысь комиссияяслöн эм оланпас вöзъян право налöн уджын веськöдланторъяс кузя.
Коми Республикаса Государственнöй Сöветö Коми Республикаса Юралысьöн пыртöм оланпас балаяс видлавсьöны сылöн вöзйöм кузя медводз.
Коми Республикаса оланпас балаяс видлавсьöны Коми Республикаса Государственнöй Сöветöн кыкысь лыддьöмысь оз этшаджык.
Вотъяс пыртöм либö киритöм, найöс мынтöмысь мездöм, Коми Республикаса сьöм обязательствояс вежöм йылысь оланпас балаяс, мукöд оланпас бала, кöні артавсьö рöскодыс Коми Республикаса республиканскöй бюджетлöн сьöм тшöт весьтö, видлавсьöны Коми Республикаса Государственнöй Сöветöн Коми Республикаса Юралысьöн корöм серти либö сылöн кывкöртöд серти. Тайö кывкöртöдыс сетсьö Коми Республикаса Государственнöй Сöветö Коми Республикаса Юралысьлы оланпас бала воан лунсянь кызь лунöн.
Коми Республикаса Оланподув, 75 статья.
Коми Республикаса Оланпасъяс примитсьöны Коми Республикаса Государственнöй Сöветлöн заседаниеяс вылын, на вöсна кö гöлöсуйтісны урчитöм депутат лыдысь унджыкыс, мöдтор кö абу артыштöма федеральнöй оланпасöн.
Мукöд правовöй акт примитсьö Коми Республикаса Государственнöй Сöветöн бöрйöм депутат лыдысь унджык гöлöсöн, мöдтор кö абу артыштöма федеральнöй оланпасöн.
Коми Республикаса Оланподув, 76 статья.
Коми Республикаса Государственнöй Сöветöн примитöм оланпасыс дас лунöн сетсьö Коми Республикаса Юралысьлы йöзöдöм могысь.
Коми Республикаса Юралысь йöзöдö Коми Республикаса оланпассö, та дырйи оланпас йöзöдöмсö эскöдö кырымалöмöн, либö вештö оланпассö индöм оланпас воöмсянь дас нёль лунöн. Коми Республикаса Юралысьöн Коми Республикаса оланпас вештöм дырйи киритöм оланпасыс бергöдсьö Коми Республикаса Государственнöй Сöветö киритöмсö подулалöмöн либö сэтчö вежсьöмъяс да (либö) содтöдъяс пыртöм йылысь вöзйöмöн.
Коми Республикаса Юралысьöн Коми Республикаса оланпас вештöм дырйи Коми Республикаса Государственнöй Сöвет вермас ошкыны индöм оланпассö водзынджык примитöм редакцияын урчитöм депутат лыдысь кык коймöд юкöнысь оз этшаджык гöлöсысь унджыкöн.
Коми Республикаса оланпассö, кутшöмöс ошкöма водзынджык примитöм редакцияын, оз вермы мöд пöв вештыссьыны Коми Республикаса Юралысьöн да сійöс колö йöзöдны сизим лунöн.
Кырымавны да йöзöдны колö сідзжö оланпас, мый абу киритöма Коми Республикаса Юралысьöн сылöн воöмсянь дас нёль лунöн.
Коми Республикаса Оланпасъяс вынсялöны найöс официальнöя йöзöдöмсянь. Мортлысь да гражданинлысь правояс да вöля дорйöм кузя Коми Республикаса оланпасъяс да Коми Республикаса мукöд нормативнöй правовöй акт вынсялöны найöс официальнöя йöзöдöмсянь дас лунысь оз водзджык.
Коми Республикаса Оланподув, 77 статья.
Ассьыс полномочиеяс олöмö пöртан кадö Коми Республикалöн Государственнöй Сöветса депутатлы быть колö кутчысьны федеральнöй оланпасъясöн урчитöм депутатскöй уджкöд йитчöм дзескöдöмъясö.
Коми Республикалöн Государственнöй Сöветса депутатлöн, коді олöмö пöртö ассьыс полномочиеяссö пыр уджалан профессиональнöй подув вылын, абу правоыс уджавны мöд мынтысяна удж вылын, велöдöм, научнöй да мукöд творческöй уджысь кындзи, мöдтор кö абу артыштöма Россия Федерацияса законодательствоöн.
Депутатлöн абу правоыс вöдитчыны аслас статусöн уджын, мый абу йитчöма депутатскöй полномочиеяс олöмö пöртöмкöд.
Коми Республикалöн Государственнöй Сöветса депутатöс могмöдöны сылысь правояс да уджмогъяс мытшöдтöг да бура олöмö пöртöм вылö условиеясöн. Депутатскöй уджлöн гарантияяс урчитсьöны Коми Республикаса оланпасöн.
Коми Республикалöн Государственнöй Сöветса депутатöс вöрзьöдны позьтöмлун кузя гарантияяс урчитсьöны федеральнöй законодательствоöн.
Коми Республикалöн Государственнöй Сöветса депутатöс вермасны чöвтны бöрйысьысьяс.
Государственнöй Сöветса депутатъяслöн уджкöд да найöс чöвтöмкöд йитчöм юалöмъяс решайтсьöны Коми Республикаса законодательство серти.
Коми Республикаса Оланподув, 78 статья.
Коми Республикаса Государственнöй Сöветлöн полномочиеяс вермасны кадысь водз дугöдсьыны сэк, кор:
1) Государственнöй Сöвет примитö асьсö лэдзöм йылысь шуöм;
2) Государственнöй Сöветöс лэдзö Коми Республикаса Юралысь федеральнöй законодательство серти тайö статьяса мöд да коймöд юкöнъясöн урчитöм подув вылын да пöрадок серти;
3) вынсялö Коми Республикаса Медвылыс Ёрдлöн решение сы йылысь, мый Государственнöй Сöветса депутатъяслöн тайö составыс абу правомочнöй, сы лыдын кор депутатъяс мездысьöны асланыс полномочиеясысь;
4) Коми Республикаса Государственнöй Сöветöс лэдзöны Россия Федерацияса Президентлöн решение кузя федеральнöй оланпасöн урчитöм подув вылын да пöрадок серти.
Коми Республикаса Юралысьлöн эм право примитны Коми Республикаса Государственнöй Сöветлысь полномочиеяс кадысь водз дугöдöм йылысь решение сэк, кор:
1) Коми Республикаса Государственнöй Сöвет примитö Коми Республикаса Оланподув, Коми Республикаса оланпас, мукöд нормативнöй правовöй акт, кутшöмъяс сулалöны паныд Россия Федерацияса Оланподувлы, федеральнöй оланпасъяслы, мый примитöма Россия Федерациялöн веськöдлантор кузя да Россия Федерациялöн да Россия Федерацияса субъектъяслöн öтув веськöдлантор кузя, Коми Республикаса Оланподувлы, кор татшöм паныд сулалöмъяссö индöма лöсялана ёрдöн, а Коми Республикаса Государственнöй Сöвет эз бырöд найöс ёрдлöн решение вынсялан лунсянь квайт тöлысьöн;
2) кор лöсялана ёрдлöн вынсялöм решениеöн урчитöма, мый правомочнöй составын бöрйöм Коми Республикаса Государственнöй Сöвет куим тöлысь чöж помся эз нуöд заседание, либö кор лöсялана ёрдлöн вынсялöм решениеöн урчитöма, мый правомочнöй составын выльысь бöрйöм Коми Республикаса Государственнöй Сöвет правомочнöй составын бöрйöм лунсянь куим тöлысь чöж эз нуöд заседание. Коми Республикаса Государственнöй Сöветлысь полномочиеяс кадысь водз дугöдöм йылысь решение вермасны примитны лöсялана ёрдлöн решение вынсялан лунсянь куим тöлысьöн.
Коми Республикаса Государственнöй Сöветлысь полномочиеяс кадысь водз дугöдöм йылысь Коми Республикаса Юралысьлöн решение примитсьö индöдöн.
Коми Республикаса Государственнöй Сöветлысь полномочиеяс кадысь водз дугöдöм йылысь решение примитöм дырйи индöны Коми Республикаса Государственнöй Сöветö неöчереднöй бöрйысьöмъяс федеральнöй оланпас, Коми Республикаса Оланподув да (либö) Коми Республикаса оланпас серти. Индöм бöрйысьöмъяс нуöдсьöны федеральнöй оланпасöн урчитöм кадö.
Коми Республикаса Оланподув, 79 статья.
