Талы помкаыс – öткымын культура учреждениеын уджалысьяслысь удждон чинтöм. Юралысьлöн кывъяс серти, министерство эз сяммы пыртны аслас юкöнса бюджетникъяслы уджысь мынтысян выль система.

Казьтыштам, мый «Красное знамя севера» газетын вöлi йöзöдöма В.Гайзер дорö «Асъя кыа» ансамбльса котырлысь шыöдчöм. Артистъяс тшöктiсны видзöдлыны, мыйла таво налöн омöльтчис олöмыс материальнöй боксянь. Письмö гижысьяс подулалiсны тайöс уджысь мынтысян выль система вылö вуджöм вöсна. Бöрынджык та йылысь сёрнитiсны Коми Республикалöн культураса уджалысьяслöн профсоюзса республиканскöй комитетлöн ыдждöдöм пленум вылын.

В.Гайзер тшöктiс Коми Республикаса Юралысьöс вежысь Александр Буровлы тöдмавны, мыйын таын помкаыс. Кыдзи петкöдлiс служебнöй прöверка, Коми Республикаса культура министерство эз вермы пыртны аслас юкöнын уджысь мынтысян выль система. Культура да искусство учреждениеясын весиг абу лöсьöдöма уджалысьяслысь бур да зiль удж донъялан система. Буретш тайö донъялöмыс эськö тöдчис бюджетын уджалысьяслöн удждон мынтöм вылö.

Тайö юкöнса профсоюзъяс эз видзöдны, кыдзи юклыссьö ышöдан фонд, да эз нуöдны гöгöрвоöдана удж.

Юкöнын зэв ыджыд веськöдлан штат, бюджетнöй сьöм зэв дыр оз мынтыны уджалысьяслы, кодъяслы оланпас серти позьö вештыны сьöмсö сöмын небюджетнöй сьöм тшöт весьтö.

Нöшта öти ыджыд тырмытöмтор – бюджетнöй сьöмсö, мый колö сетны медводз удждон мынтöм вылö, сетiсны коммунальнöй услугаысь мынтысьöм вылö да ньöбисны уна пöлöс прöдукция. А та вылö Министерстволы аслыс колö корсьны сьöмсö, абу кö сiйö небюджетнöй фондын. Эмöсь сэтшöмторъяс, кор подулавтöг сетöны премия государственнöй учреждениеясса юрнуöдысьяслы.

Та вöсна 2010 вося тöвшöр тöлысьын уна бюджетнöй учреждениеса уджалысьяслöн тöдчымöн чинiс удждон.

«Лыддя татшöмторсö позьтöмторйöн, мый нинöмöн оз позь подулавны, – юöртiс В.Гайзер. – Уджысь мынтысян выль система ошкö да ышöдö бура да сьöлöмсянь уджалысь специалистъясöс. Но сылöн абу могыс чинтыны удждонсö! Та вöсна правильнö элясьöны культураса работникъяс, кодъяслöн удждоныс тöлысьысь тöлысьö некутшöм подулавтöг абу öткодь. Лыддя, мый Коми Республикаса культура министерство эз бура уджав ведомствоувса учреждениеясын уджалысьяслы уджысь мынтысян выль системаöн вöдитчöм кузя да, позьö шуны, вöйпис Правительстволысь уджсö та кузя».

Прöверкалöн кывкöртöд серти В.Юрковскийöс кыскöма дисциплинарнöй кывкутöмö: öлöдöма службалы абу тырвыйö лöсялöм йылысь.

Юралысь тшöктiс культура министрлы выль ног матыстчыны сьöм планируйтöм да видзöм дорö, та дырйи уджас мед вöлi бур помшуöм, лöсьöдны удж донъялан критерийяс, кутны культураса работникъяслы тöлысся шöркодь удждонсö колян вося тшупöд серти да та дырйи артавны учреждениелöн уджас быд уджалысьлысь ассьыс пайсö.