Перымса зверинöй стиль серти серпасалöм зарни варыш, коді гöрд геральдическöй пöв вылын: лэбач морöсас - аньлöн чужöмбан, кодöс кытшалö квайт йöра юр. Енлы эскан "Лэбач-морт-йöра" композицияын тöдчö комилöн мифологическöй видзöдлас.
Традиционнöй видзöдлас серти лэбзьысь варышыс петкöдлö шонді, власьт, медвылыс мир. Лэбачлöн морöсас аньлöн чужöмыс петкöдлö Зарни Аньöс, олöм радейтысь шондіа ань енмöс, мир кутысь мамöс. Йöра петкöдлö ёнлун, веськыдлун, мичлун. Космологическöй петкöдлöмъясын сійö гöгöрвоöдö мир гöгöрбок лöсьыда артмöдöмлысь синтез. Зарни да гöрд рöмъяссö канпасын öтлаалöмыс петкöдлö коми фольклорын асъя, тувсовъя, бур шонді, мамлун да чужöм. Такöд тшöтш, öнія общественно-политическöй гöгöрвоöдöмын гöрдыс (фоныс) петкöдлö войтырлысь да власьтлысь водзмöстчöмсö, авъялунсö, а пöв формакöд лöсялöмыс висьталö уна сикас войтыра Российскöй государствоö пырысь коми войтырлöн историческöй олöм йылысь. Та дырйи джынвыйö восьса бордъяса ачыс лэбачыс крест сяма, мый гöгöрвосьö кыдзи духовнöй да государственнöй власьтлысь пас.
